Demo

MADONZVO EZVIITO

zvinangwa: Panopera chidzidzo chino mudzidzi anotarisirwa kunge ava kugona:
a) Kudoma mhando dzemadonzvo ezviito.
b) Kunyukura madonzvo ezviito kubva muzvinyorwa.
c) Kunyora zvirevo zvine madonzvo ezviito akasiyana.

Tsanangudzo

Zviito zvine mashandisirwo azvinoitwa izvo zvinobva zvaita kuti zvireve zvakasiyana.
Zvirevo zvakasiyana izvi ndiwo anonzi madonzvo zviito.

Mhando dzemadonzvo ezviito

1. Donzvo rekutuma

- Donzvo iri nderekutuma munhu kuita kana kusaita chinhu.

a) Kutuma kana kuraira munhu mumwe.

Gara pasi udye sadza.
Mhanya wakamirirwa.
Tora chibage uende kuchigayo.

b) Kutuma kana kuraira vanhu vakawanda kana munhu waunoremekedza.

Endai kugomo munotsvaga huni.
Dzingai huku idzo dzisasvike pamagwere.
Sekuru taurisai handina kunzwa.

2. Donzvo rekuudza/kuzivisa

Vasikana vakatamba zvinodadisa.
KuChitungwiza kunonetsa mvura.
Tanaka ndiye atema huni dziri pabakwa.

3. Donzvo rekuita

Donzvo iri riri muchiito.
Donzvo haritaridzi vaiti kana nguva yechiito, rinotaridza kuita kana kuitika kwezvinhu.

Mienzaniso

Ndinoda kuenda kusvondo.
Amai vari kubika sadza remanheru.
Tongai ari kuda kufamba rwendo neMugovera.

4. Donzvo rezvanga zvichiitika

Tasvika vachangopedza kurima.
Mukuru wechikoro paasvika, awana vana vachangoenda kumba.
Mvura yanaya zvikuru vachangobva.

5. Donzvo rekukurudzira

Donzvo iri rinokurudzira kuita kana kusaitwa kwechinhu.
Chiito chinopihwa chivakashure chekurudziro nga- kana kutsinhana naha-.

Mienzaniso

Haikona kutamba nechikoro.
Ngatibatei pamwe ndima ikurumidze kupera.
Ngavasatambire pedyo nemugwagwa.

6. Donzvo rechishuwo

Donzvo iri rinoburitsa zviri kudiwa kana kushuvirwa nemutauri.
Chiito chinotungamirwa nakuti.

Mienzaniso

Baba vanoda kuti vana vasatambire pedyo netsime.
Varaira kuti vauye kunze kusati kwadoka.
Ndinoda kuti ndisvike kuHarare mangwanani.

7. Donzvo rezvinogoneka/rekwaniso.

Iri donzvo rinopangidza zvingangoitika uye rinoshandisa chiratidza nguva -nga-.

Mienzaniso

Tingafare kana mvura ikanaya.
Ukandipa mari ndingakutende chaizvo.
Nhumbi dzikarara panze dzingabiwe nembavha.